People & Planet: Un destino común
15/07/2024
O Fondo Galego implica á mocidade e aos municipios na loita contra o cambio climático a través deste proxecto europeo.
Os municipios socios do Fondo Galego de Cooperación e Solidariedade animan á mocidade a adoptar hábitos máis sostibles a través de metodoloxías innovadoras como o artivismo ou a comunicación de guerrilla. O proxecto europeo People & Planet ofrece tamén formación a persoal político e técnico para impulsar a implementación da Axenda 2030 a nivel local.
Concienciar ás e aos mozos europeos sobre as consecuencias do cambio climático para que se convertan en axentes de transformación cara un mundo máis sostible é o obxectivo do proxecto ‘People & Planet: Un destino común’. A iniciativa, que involucra a 17 entidades de oito países europeos e de Cabo Verde, busca tamén reforzar aos gobernos municipais para promover políticas públicas a favor do desenvolvemento sostible, tendo en conta a interdependencia local-global.
Para conseguir estas metas, o Fondo Galego de Cooperación e Solidariedade impulsou máis de 70 actividades noutros tantos concellos socios, con diversas e innovadoras accións. Desde os transgresores obradoiros de performance e comunicación de guerrilla, ata suculentas sesións de cociña sustentable, pasando por consellos xuvenís, formacións sobre a Axenda 2030, concursos de vídeo, exposicións virtuais, o “apagón” convocado polo Día do Medio Ambiente ou a campaña ‘Water of the future’.
Outra das metodoloxías coas que o Fondo Galego adoita poñer en práctica a educación para a cidadanía global é a do artivismo, apostando polo poder transformador da creación artística para promover o pensamento crítico e reivindicar un cambio social. Tamén a través de People & Planet pintáronse murais en oito municipios, centrados no ODS 6 Auga limpa e saneamento, e no ODS 13 Acción climática. Unha liña de traballo á que se suman os obradoiros de debuxo urbano para poñer en valor distintos espazos naturais.
O proxecto People & Planet, financiado polo programa DEAR da Comisión Europea, culminará nos próximos meses despois de catro anos nos que chegou a miles de mozos e a centos de representantes municipais en Galicia. Non obstante, o Fondo Galego, ofrece a maiores diversas actividades ás tres deputacións e 111 concellos socios para sensibilizar á cidadanía a favor da solidariedade internacional, a realidade dos países empobrecidos ou a equidade de xénero, propostas que poden tomar forma de teatro, cine, concerto, charla, exposición, obradoiro, etc. Con todo, é a cooperación internacional o eixo central do Fondo Galego de Cooperación e Solidariedade que, desde a súa constitución en 1997, apoiou uns 200 proxectos en máis de 30 países do Sur Global, entre os que destacan Nicaragua, Cuba, Perú, Cabo Verde e, nos últimos anos, Mozambique, Guinea-Bissau e os campamentos de persoas refuxiadas saharauis. Auga, vivenda, xénero, educación ou saúde son algúns dos campos de actuación.
Ademais, o Fondo Galego brinda intercambios de experiencias ao persoal político e técnico das administracións locais socias, incluso sobre o terreo, e desde 2015 apoiou o proceso de localización da Axenda 2030. A asociación funciona como un espazo transpartidario e plural, inspirado pola vontade de consenso e colaboración. Un traballo en rede que pon de manifesto o compromiso das deputacións e concellos galegos cos Dereitos Humanos e coa loita contra a pobreza e as desigualdades a nivel global.
