Gandia, epicentro do municipalismo solidario co III Encontro de Gobernos Locais e Cooperación Internacional ao Desenvolvemento
02/05/2025
A cidade valenciana acolle o 27 e 28 de maio este espazo de reflexión, debate e diálogo
Gandia, capital da comarca da Safor (València), que conta con 80.095 habitantes (INE 2024) converterase no epicentro da cooperación municipalista española ao acoller o III Encontro Estatal de Gobernos Locais e Cooperación Internacional ao Desenvolvemento, un espazo de traballo conxunto entre administracións locais comprometidas coa solidariedade global.
O municipio converterase os días 27 e 28 de maio no centro de debate estatal sobre cooperación internacional descentralizada, tomando o relevo de Lugo e Córdoba, sedes das anteriores edicións, e faino co respaldo do seu sólido compromiso institucional e cidadán cos municipios do sur global.
O Concello de Gandia é socio do Fons Valencià per la Solidaritat desde o 4 de decembro do 2.000, momento no que se aprobou no pleno local por unanimidade de todos os grupos políticos do plenario municipal. Así, cumpre 25 anos de compromiso coa erradicación da pobreza e a igualdade de oportunidades en municipios de países empobrecidos a través do Fons Valencià.
Ademais, Gandia é un dos municipios pioneiros na Comunitat Valenciana en establecer unha concellería específica de cooperación internacional, así como en impulsar actividades emblemáticas como “Gandia Solidaria”. Tamén, a cidade mantivo unha presenza constante na Xunta Executiva do Fons Valencià per la Solidaritat durante distintas lexislaturas, con gobernos de diferentes cores políticas, o que reflicte un compromiso transversal e sostido coa cooperación ao desenvolvemento.
Todos os proxectos do Fons Valencià per la Solidaritat, tanto de cooperación internacional ao desenvolvemento (cooperación directa, cooperación técnica e acción humanitaria e de emerxencias) como de educación para o desenvolvemento e a cidadanía global, son do Concello de Gandia -entidade que tivo un papel de participación activa en diversos proxectos-, así como do resto de entidades locais socias do Fons Valencià. Isto demostra o compromiso transversal de toda a cidadanía gandiense cos municipios dos países do sur.
Coa celebración deste encontro en Gandia, dáse un novo paso cara á descentralización real dos espazos de debate e decisión sobre políticas públicas de cooperación, visibilizando o papel protagonista dos municipios na construción dun mundo máis xusto, solidario e sostible.
Este III Encontro, promovido pola Confederación de Fondos de Cooperación e Solidariedade (CONFOCOS), reunirá a representantes dos máis de 1.100 gobernos locais que integran os 9 fondos territoriais membros da Confederación, entre eles o Fons Valencià per a Solidaritat.
Programa do III Encontro
O III Encontro, organizado pola Confederación de Fondos de Solidariedade (CONFOCOS) e o Fons Valencià per la Solidaritat -co apoio da Secretaría de Estado de Cooperación Internacional (SECI), a través da Dirección Xeral de Políticas de Desenvolvemento Sostible (DGPOLDES) e a Axencia Española de Cooperación Internacional para o Desenvolvemento (AECID), do Ministerio de Asuntos Exteriores, Unión Europea e Cooperación do Goberno de España, e a colaboración da Federación Española de Municipios e Provincias (FEMP); a Federación Valenciana de Municipios e Provincias (FVMP), a Dirección Xeral de Inclusión e Cooperación ao Desenvolvemento da Vicepresidencia Primeira e Conselleria de Servizos Sociais, Igualdade e Vivenda da Generalitat Valenciana; a Deputación de València, e o Concello de Gandia- ten como obxectivo seguir impulsando e poñendo en valor a cooperación internacional realizada desde os gobernos locais; reflexionar sobre o papel da cooperación internacional municipalista no novo contexto internacional; revisar a contribución á Axuda Oficial ao Desenvolvemento (AOD) desde o municipalismo; analizar as oportunidades e os desafíos na solidariedade global municipalista do novo Real Decreto de Subvencións; e posicionar como liña de acción chave nas políticas municipais a cooperación feminista e a importancia global da participación das mulleres no desenvolvemento local.
Pódese consultar o programa completo aquí: https://encuentroestatal.org/e2025/programa-do-encontro-estatal-2025/
Inscricións abertas
As alcaldías, edís municipais e o persoal técnico local de Cooperación, Solidariedade, Axenda 2030, Servizos Sociais, etc. que desexen asistir ao III Encontro poden formalizar a súa inscrición (lembramos que a participación é totalmente gratuíta). Recoméndase realizar o rexistro canto antes, e como máximo ata o 22 de maio, xa que o evento conta con aforo limitado.
A inscrición pódese realizar na páxina web oficial do III Encontro (https://encuentroestatal.org/inscripciones/).
Ademais, na web oficial, púxose ao dispor de todas as persoas interesadas un apartado con información relevante: aloxamentos recomendados, indicacións de como chegar, información sobre Gandia e a Comunitat Valenciana, etc. En caso de non quedar resoltas todas as dúbidas, pódese contactar coa organización por correo electrónico (oficina@fonsvalencia.com) ou por teléfono (+34 96 227 24 60).