Bombeiros do Salvador reciben formación en emerxencias no País Vasco grazas á cooperación internacional municipalista
27/02/2025
Esta capacitación especializada é grazas á colaboración de Euskal Fondoa, a Fundación SUESKOLA e a Axencia Española de Cooperación Internacional para o Desenvolvemento (AECID)
A Asociación de Entidades Locais Vascas Cooperantes – Euskal Fondoa, fondo socio da Confederación de Fondos de Cooperación e Solidariedade (CONFOCOS), está a impartir en Euskadi unha formación en emerxencias a tres integrantes do Corpo de Bombeiros/as do Salvador.
Así, o Centro de Adestramento en Prevención e Extinción de Incendios de Ordizia (Gipuzkoa) e o parque de manobras de bombeiros de Ispaster (Bizkaia) son os lugares nos que o subdirector do Corpo de Bombeiros/as do Salvador, Erick Vásquez, a bombera Paola Pacheco e o bombeiro René Sánchez, están a ser instruídos en riscos químicos, incendios en interiores e ventilación.
Este programa de formación, que comezou o día 17 de marzo e remata este venres día 28, enmárcase nunha estratexia de fortalecemento de capacidades que se iniciou en 2022, cando o Corpo de Bombeiros/as do Salvador realizou unha misión de identificación de oportunidades de formación en Euskadi. Como resultado desa visita, en 2023 executáronse dous paquetes de formación no Salvador, o primeiro en maio, centrado na atención de incendios forestais e peritaxe en incendios, e o segundo en setembro, enfocado en incendios de materiais químicos e vehículos híbridos ou eléctricos.
Euskal Fondoa realiza esta capacitación especializada coa colaboración de Fundación SUESKOLA a través dun Real Decreto asinado entre a Confederación de Fondos de Cooperación e Solidariedade e a AECID. Real Decreto que permite fortalecer capacidades locais, mellorar a calidade de vida a nivel municipal e promover o desenvolvemento sostible a través da colaboración directa entre cidades e municipios de distintos países. Neste caso o proxecto reforza o compromiso da cooperación descentralizada coa mellora das capacidades na xestión de emerxencias e desastres.
A CONFOCOS, un espazo de traballo conxunto pola cooperación internacional municipalista
A Confederación de Fondos de Cooperación e Solidariedade (CONFOCOS) reúne a máis dun milleiro de entidades locais do Estado español (entre concellos, mancomunidades, deputacións e consellos) agrupadas nun total de 9 fondos territoriais. A confederación naceu en 1995 e ten como obxectivos contribuír a impulsar a cooperación descentralizada municipalista dentro e fóra dos ámbitos territoriais dos seus fondos membros e ser interlocutor ante as institucións estatais, europeas e internacionais naquelas formulacións onde hai intereses coincidentes.
Actualmente, forman parte de CONFOCOS o Fondo Andaluz de Municipios para a Solidariedade Internacional, Fons Català de Cooperació ao Desenvolupament, Asociación de Entidades Locais Vascas Cooperantes-Euskal Fondoa, Fondo Estremeño Local de Cooperación ao Desenvolvemento, Fondo Galego de Cooperación e Solidariedade, Fons Mallorquí de Solidaritat i Cooperació, Fons Menorquí de Cooperació, Fons Pitiús de Cooperació e Fons Valencià per a Solidaritat.
