O Consello de Ministros aproba o Plan Director da Cooperación Española para os anos 2024-2027 e o novo Estatuto das Persoas Cooperantes.

O Consello de Ministros, a proposta do Ministerio de Asuntos Exteriores, Unión Europea e Cooperación, aprobou o Plan Director da Cooperación Española para os anos 2024-2027, que contén os obxectivos e prioridades que orientarán a actuación da cooperación internacional para o desenvolvemento sustentable nos próximos anos. Tamén aprobou o Real decreto do Estatuto das Persoas Cooperantes, que redefine o marco laboral e social deste colectivo, garantindo unha carreira profesional digna e protexendo as súas condicións laborais. Son os primeiros fitos do despregamento da nova Lei de Cooperación aprobada en 2023.

O ministro de Asuntos Exteriores, Unión Europea e Cooperación, José Manuel Albares, destacou que “o ano pasado foi histórico ao aprobarse unha lei de cooperación que dá conta da transversalidade desta política pública. Con ese texto despregamos unha reforma ampla e profunda da cooperación que tivo continuidade na aprobación do Plan Director, un documento que se aproba tras un longo proceso participativo coa sociedade civil, as Comunidades Autónomas, os entes locais e os grupos parlamentarios”.

Plan Director da Cooperación Española 2024-2027

Sobre o Plan Director, o ministro Albares explicou que “en primeiro lugar, apuntala o compromiso de alcanzar o 0,7% da Renda Nacional Bruta en Axuda Oficial ao Desenvolvemento para o ano 2030. Unha reivindicación histórica da sociedade española. En segundo lugar, este Plan inclúe por primeira vez a África Occidental e o Sahel como unha das súas rexións prioritarias, xunto á tradicional e permanente relevancia de América Latina. Imos prestar aínda máis atención á África Subsahariana cun acento particular na creación de oportunidades, de traballo e formación para os mozos e na atención e protección dos dereitos das mulleres”.

“En coherencia co anterior, e en liña coa Axenda 2030, fixámonos como obxectivo promover unha triple transición social, económica e ecolóxica. A loita contra a fame, contra o cambio climático, a educación, o acceso á auga e o avance nos dereitos das mulleres e nenas son os sectores prioritarios do novo Plan Director. Finalmente, este novo Plan Director integra a reforma do sistema de Cooperación Española e serve de guía para o seu desenvolvemento sinalando follas de ruta específicas cos diferentes actores do sistema de cooperación: ONGD, sindicatos, universidades, Comunidades Autónomas e entes locais. No centro da reforma do sistema sitúase a AECID que, grazas ao seu novo Estatuto que aprobaremos despois do verán, reforzará o seu papel como pedra angular do sistema na coordinación operativa de actores e a xeración de alianzas”, detallou.

Estatuto das Persoas Cooperantes

A nova norma, que substitúe a do 2006, incorpora varias novidades para os 2.600 cooperantes españois, como a ampliación do marco de aplicación, a mellora dos dereitos das persoas cooperantes e as súas familias e o reforzo dos deberes das persoas cooperantes e das entidades promotoras. Ademais, establécense medidas para promover a formación e o desenvolvemento profesional das persoas cooperantes, así como para facilitar a súa reincorporación unha vez finalizada a súa misión internacional.

En canto a dereitos, confirma a garantía dun seguro colectivo concertado pola AECID (Axencia Española de Cooperación Internacional e Desenvolvemento) que, como novidade, estende a súa cobertura ao cónxuxe do cooperante ou persoa que manteña unha relación análoga, aos seus descendentes e ascendentes, no caso de que dependan do mesmo, ata o primeiro grao de consanguinidade ou afinidade, sempre que non estivesen cubertos polo réxime de protección correspondente.

O papel da cooperación municipalista

Desde a Confederación de Fondos de Cooperación e Solidariedade (CONFOCOS) celebramos o recoñecemento expreso dos entes locais como axentes de cooperación tal e como contempla a Lei 1/2023, de 20 de febreiro, de Cooperación para o Desenvolvemento Sustentable e a Cooperación Global, no seu artigo 35. Unha lei que ademais no seu artigo 37 considera o papel do municipalismo no sistema da cooperación española para o desenvolvemento sustentable e a solidariedade, mencionando que a cooperación exercida polos entes locais poderá exercer tamén a través dos fondos municipais de cooperación.

Desde a CONFOCOS estamos convencidos/as do avance que supón a nova lei e polo tanto o avance que supoñen tanto o VI Plan Director, como o Estatuto das Persoas Cooperantes no camiño cara a un desenvolvemento global máis participado, máis sustentable, máis equitativo e máis xusto. Seguimos reivindicando o papel da cooperación descentralizada municipalista como parte da estrutura de estado e como ferramenta imprescindible para afrontar os retos globais. Dicímolo e practicamos desde hai tempo, o local é global e é que as solucións ás grandes crises da humanidade seguen principios comúns.