A Confederación impulsa o manifesto “Cooperación contra o coronavirus”

A Confederación de Fondos de Cooperación e Solidariedade, que suma máis de 1.300 gobernos locais do Estado, lanza este xoves 30 de abril o manifesto «COOPERACIÓN CONTRA O CORONAVIRUS». Esta declaración afirma que nun contexto global abandonar a poboación dos países do sur á súa sorte non é unha opción e propón que, unha vez se saia do estado de alarma nos nosos territorios, os esforzos se concentren novamente en axudar outros pobos e países menos preparados para resistir os efectos do coronavirus.

A presidenta da Confederación de Fondos de Cooperación e Solidariedade, Nuria Parlon, declarou que “esta pandemia pon a proba a toda unha xeración. Deles dependerá o futuro do mundo durante décadas”. A máxima responsable da confederación asegurou que agora “máis que nunca hai que promover unha gobernanza global inspirada nos Obxectivos de Desenvolvemento Sostibles (ODS). Neste novo marco, a cooperación internacional ao desenvolvemento será estratéxica e os actores locais queremos ser protagonistas deste gran reto”.

SOPORTES DE INSTITUCIÓNS E ELECTOS E APOSTA POLA COOPERACIÓN

Nunha primeira fase, a vontade dos impulsores é recoller o máximo de adhesións de institucións locais e supralocais e o máximo de adhesións de persoas electas locais e supralocais. O obxectivo é visibilizar o apoio do municipalismo á cooperación ao desenvolvemento como instrumento efectivo e necesario para dar unha resposta ao desafío global que aconteceu coa pandemia da COVID-19.

Nunha segunda fase este manifesto ten que servir para garantir o mantemento dos orzamentos de cooperación ao desenvolvemento e solidariedade internacional dos municipios e entes supramunicipais. Tamén é unha aposta para fortalecer os esforzos dos gobernos locais do sur e da sociedade civil nos países máis empobrecidos, en conflito violento ou que apoian ás persoas que se ven forzadas a emigrar e buscan refuxio en terceiros países.

Ante a ameaza da COVID-19, desde os Fondos de Cooperación e Solidariedade, apóstase por contribuír a evitar futuros rebrotes e conter o risco da extensión da próxima pandemia global. A súa actuación, segundo defenden, non só se limita á resposta sanitaria inmediata, senón que se basea especialmente no fortalecemento das capacidades locais na xestión de servizos básicos de proximidade para afrontar calquera crise global con impacto local.

➡️ Manifesto “Cooperación contra o coronavirus” e formulario de adhesión para institucións e cargos electos (clica aquí)
📸 World Bank Photo Collection. Creative Commons