Participamos no II Encontro Internacional Think Europe Compromiso 2030 “Cidades Intermedias, claves do desenvolvemento”
18/01/2019
O Encontro internacional “Think Europe Compromiso 2030”, organizado por United Cities and Local Governments, reuniu entre o 16 e o 18 de xaneiro en Soria a máis de 250 líderes e lideresas mundiais co reto de reforzar o papel das cidades intermedias na consecución dos Obxectivos de Desenvolvemento Sostible.
Os debates deste segundo encontro, centraronse no papel das cidades intermedias como nexo vital entre o medio rural e o medio urbano, centrado en tres eixes: Xustiza Social, Cooperación e Valores; A cohesión territorial: condición esencial para alcanzar os ODS; e as Axendas Urbanas: panca para a Axenda 2030.
A Confederación de Fondos de Solidariedade e Cooperación foi invitada a este congreso, para participar na mesa: “Cooperación Internacional para o desenvolvemento e as Axendas das cidades”, na que o noso presidente, e alcalde de Nigrán, Juan González Pérez, compartiu espazo con Aina Calvo Sastre, Directora da Axencia Española de Cooperación Internacional para o Desenvolvemento (AECID); Firdaous Oussidhoum, Coordinadora do Foro de Cidades Intermedias de CGLU; Johannes Krassnitzer, Programa das Nacións Unidas para o Desenvolvemento (PNUD); Juan Ignacio Siles del Valle, Director da Conferencia Iberoamericana na Secretaría Xeral Iberoamericana (SEGIB); Andrés Rodríguez Amayuelas, Presidente da Coordinadora de ONGD; Mohamed Sefiani, Alcalde de Chefchaouen (Marrocos) e Antonio Zurita, Director Xeral da Dirección Xeral de Acción Internacional e Cidadanía Global do Concello de Madrid.
Aina Calvo, Directora da Axencia Española de Cooperación para o Desenvolvemento (AECID), que presentou o debate, anunciou que a Axencia Española de Cooperación para o Desenvolvemento quere afianzar as relacións para traballar conxuntamente tanto coa FEMP como coa Confederación de Fondos de Cooperación e Solidariedade, xa que somos actores clave que mantiveron a cooperación municipalista no Estado Español.
Algunhas das cuestións que se abordaron foron os mecanismos que serven para conectar e favorecer a cooperación descentralizada entre as cidades intermedias.
Para a Confederación estes mecanismos pasan por impulsar e fortalecer os espazos de reflexión e de traballo conxunto para promover a aplicación da Axenda 2030, e as diferentes políticas públicas de desenvolvemento. Así como poñer en valor a capacidade dos gobernos locais para a implementación dos ODS a nivel nacional, xa que todos os ODS inclúen metas relacionadas con competencias e responsabilidades da esfera local, principalmente na prestación de servizos básicos e na promoción dun desenvolvemento territorial endóxeno, inclusivo e sostible.
En palabras do noso presidente: “A contribución dos municipios e entes locais, por pequena que sexa, será fundamental, porque permitirá concienciar ao cidadán e mostrar que as institucións poden estar cerca”.